¿Qué pasa colos murgaños?


   Los murgaños son unos micromamíferos perdesconocíos polos non naturalistes en xeneral, por mor a los sos vezos nocherniegos y pol so tamañu pequeñu.  La verdá que a mio préstanme muncho, y siempres qu’atopo dalgún estudiolu con detalle. En xeneral toos los qu’atopo apaecen muertos nos caminos, puestos na mayoría de los casos por raposos col envís de marcar el so territoriu, aprovechando la golor tan fuerte que tienen los murgaños. Ye tala a golor (y la sabor) que salvo necesidá, nun los comen nin los raposos nin otros mamíferos carnívoros. Otru casu son les curuxes, que gracies a qu’el so sentíu d’olfatu nun ye mui bonu nun reparen nel fuerte sabor a almizcle d’estos animalinos. Los murgaños, en munchos casos, son les preses más consumíes poles curuxes, dalgo que sabemos gracies al estudiu de les egagrópiles (¿Qué come'l "búho piquiñín?, ¿De verdá los cuervos desfaen los maizales? ), anque ye verdá qu’anque son la presa más consumida, nun ye la que más biomasa aporta a la dieta de les curuxes, pol so tamañín.

Crocidura russula (fonte Rasbak - Own work, en Wikipedia, Crocidura russula)

   Va 17 años qu’estudio la dieta de la curuxa (Tyto alba) nel conceyu de Gozón, sofitáu nes egagrópiles, polo que teo una base de datos percuriosa, y gracies a ella dime cuenta d’un fechu d’interés, les curuxes poco a poco fueron baxando’l númberu de murgaños de xéneru Sorex que comíen.

   Anties de siguir voi cuntate dalgo más de los murgaños nel mio conceyu. Ente los restos que apaecen nes egagrópiles de curuxa en Gozón atopamos dellos xéneros de murgaños, los más comunes (según los datos d’egagrópiles) son los del xéneru Crocidura (representáu por C. russula y C. suaveolens), venceyaos a los medios abiertos, praos , güertes y llendes de caminos, y por esto mesmo ye polo que son muncho más comunes nes egagrópiles de curuxa, por que comparten hábitat. El segundo xéneru ye Sorex (con S. coronatus y S. minutus), que ta venceyáu a faces más de viesca, zones de fueya suelto y sebes, na dieta de la curuxa son más escases, pues nun s’aventuren tanto a salir a campu abiertu. Un tercer xéneru apaez de xemes en cuando, son los murgaños del xéneru Neomys, que viven a la vera les ñores y regatos, y que namás los atopé tres vegaes en toos estos años en Gozón (2001, 2003 y 2004), onde escaseen pola mala calidá ambiental de la rede fluvial del conceyu.

   La cosa ye que, como antes dixe, el númeru de murgaños del xéneru Sorex foi amenorgando a lo llargo d’estos años, o eso paez al ver la gráfica:

Evolución del percetax de los distintos xéneros de murgañu en Gozón.

   Puede vese como Sorex pasa de representar más del 20% a primeros de la dómina, a tar perbaxo del 5% a lo cabero. Teo que dicir que les muestres nun fueron toes igual de grandes, pero nengún añu fueron menos de 100 egagrópiles les analizaes (dellos años pasen de les 500). Esti datu puede facete pensar que a lo meyor toi, entós, engañándome al ver los datos, por eso usé un test estadísticu sofitáu nel análisis de frecuencies, el test de la G (pim-pam, cunta Lacasitos.). El resultáu sofitó la mio idea, pues el test dixo que les diferencies ente los datos yeren persignificatives al ras del 5% (uso esti valor por que ye’l que se suel usar xunto col del 1% pa aceutar como válidos los datos, anque en realidá el ras taba nel 3%).

   ¿Y qué puede significar esto? Si te digo la verdá, colos datos que tenemos nun lo podemos saber. Nun primer momentu pensé que taba delantre d’un descensu de la población de los murgaños del xéneru Sorex, pero nun teo datos pa dar esta tesis como cierta, nin siquiera como posible. Ye más hai milenta posibilidaes que pueden esplicar esti socesu: aumentu del xéneru Crocidura, preferencies alimenticies de les curuxes, l’azar (recordemos que tenemos un 5% de posibilidaes de qu’esta distribición débase a l’azar), tamién pude sesgar yo los datos al nun facer un mesmo esfuerzu tolos años o al nun recoyer les egagrópiles siempre nos mesmos llugares… Esto suel pasar cuando uses datos que se garraron ensin nengún oxetivu, puedes atopar datos chocantes,  interesantes y que den una idea de que dalgo ta pasando, pero al nun tener un diseñu esperimental formal, los resultaos van ser poco más qu’una curiosidá. Como muncho pueden valite pa trazar un plan más ambiciosu, pa dir a la gueta d’estos mesmos resultaos baxo criterios esperimentales más controlaos, colos que dir encaminando la investigación a una respuesta contrastable.  Asina ye la ciencia, que se-y va facer. Nun me queda otra, habrá que plantegase facer les coses baxo un control esperimental formal. Diré informándote de lo que soceda.

Comentarios