El zucre de la "cocaloca"

   Cuando falamos de lo perxudicial de los refrescos viennos a toos la imaxen d’una famosa bebía de cola, que ye’l paradigma de les bebíes azucaraes, pero como vamos ver, nun ye esta la que más tien, anque tien muncha…

   Teo que dicir que coles lleis d’etiquetáu actuales, podemos saber cuánto zucre tien una bebía’n segundos, anque como esti ye un blogue d’esperiementos caseros, namás vamos usar esa información pa facer comparancia colos resultaos de nueso.

   El métodu que te propongo nun necesita nengún cálculu, polo que va ser del gustu de toos los que refugáis de les mates. Pa ello vamos facer una curva de callibración cola que poder comparar. 

   Pa facer la curva lo que fice foi preparar cuatro muestres de solución azucarao, al 5, 10, 15 y 20 %. ¿Cómo? Sabemos qu’un llitru d’agua pesa cuasi un kilu (0.9999720008 kg), polo que pa facer una solución al 5%, basta con amestar 50 gramos d’ello a un llitru, o la proporción que queramos. Palo que queremos facer, un llitru ye muncho, asina que yo preparé 10 milillitros, o sía, amesté-y 0,5 g (si la to pesa nun tien tanta precisión, fae 100 ml, que sedrán 5 g de zucre) la pa muestra al 5%, 1 g pa la de 10%...

   Llueu pesé la muestra, que ya nun son 10 gramos, sinon 10 gramos más el pesu del zucre, y grafiquelos asina:

   Como ves les escales de la gráfica tán perdividies, la de concentración de 0,1% en 0,1%, y la de masa de 0,5 en 0,5 gramos, esto ye adré, vamos usar la curva de callibración (anque ye una reuta) pa conocer la concentración de zucre (de la triba que seya) de delles bebíes namás que pesándoles, a ver que socede…

   Garré y pesé muestres de 10ml de cuatro bebíes: zumu de mazana, zumu d’uva, bebía de cola y bebía isotónica. La masa d’eses muestres treslladela a la gráfica, ye dicir, la bebía isotónica, per exemplu, pesaba 10,25 gramos, busqué esta midida na gráfica, y siguí hasta chocar la llinia, la perpendicular de la trazada nesi puntu sedrá la concentración, o sía 8%.

Estes son les midides qu’atopé:

   Estos datos pueden date a pensar que son erróneos, poro al mirar la información nutricional de los productos vemos que nun ta tan trafucada, abaxo ves el % de zucre que declara la etiqueta, y el % d’error respeuto a los datos que atopé yo:

   Ya ves que les diferencies son perpequeñes, de xuru per acio a errores de los mios aparatos de midida, que son caseros y baratos, anque menos d’un 2% d’error ya asumible perfeutamente.

   ¡Coime! Resulta que la bebía de cola, de la que tanto refuguen pa guariar la llinia, tien menos zucre que los sanos zumos de frutes, esto ye la de coyer. Pues dicir que bono, esos zumos son industriales y de xuru que-yos amestan daqué, poro fice la preba col zumu de naranxa fecho’n casa, y atopé un 10,4% de zucre, cuasi la mesma que la del refrescu. Esto nun ye nuevo, y la recomendación de da-yos a los neños un zumín de naranxa nel almuerzu cada vez ta menos aceutada ente los nutricionistes serios, ya que tamos dando-yos un aporte de zucre perriba de les sos necesidaes, per exemplu, un vasao de zumu de naranxa de 250 cl (en vasu normal), fechu con 2-3 naranxes tien 115kcal (un de cola tien unes 135 kcal), meyor ye comer una, que tien 2-3 vegaes menos de zucre, y amás tien freba, y otros componentes que malapenes lleguen al vasu, como los aceites que tien l’albéu de la naranxa (lo blanco). En xeneral, les bebíes dulces cada día son menos recomendaes polos nutricionistes, al menos de forma frecuente, pues ensin damos cuenta tamos consumiendo munches caloríes extra, que nun van bien al nueso organismu.

Nota: los zumos qu'usé yeren zumos propiamente, que según la norma nun pueden llevar zucre amestao, otrosí pueden llevalo los néctares, bebíes que por norma lleven una pollinada más de zucre, que los propios zumos.