¿N'abril agües mil?: poniendo a prueba un refrán



     Una de les manifestaciones más riques de la cultura popular ye’l refraneru. Los refranes con una sentencia d’unes poques pallabres pretenden tresmitir un saber fonderu sobre’l tema del que s’ocupen, por casu una predicción meteorolóxica. Asina toos conocemos el dichu “N’abril agües mil”, ye de suponer qu’esti refrán tien un sofitu empíricu, que llevó al que lu “inventó”, cuantayá, a permitise facer esa afirmación. Pola mio esperiencia en meteoroloxía popular se qu’en munchos casos estos refranes tienen un sofitu empíricu, poro n’otros afortequen en creyencies y mitos pervieyos, ¿sedrá esti refrán verdaderu?  Colos datos meteorolóxicos que teo d’años d’esbilla na estación que xestioné munchos años, propúseme comprobar la realidá de la sabiduría popular nel casu que nos ocupa.


  
   Too a lo llargo d’una década (1992-2002) tuve recoyendo los datos meteorolóxicos d’una estación afitada nel conceyu de Castrillón, esos datos van valime perbien pa saber si abril tien “mil agües”, pa ello fici un cálculu percenciellu, calculé la media de precipitaciones por meses pa tola dómina estudiada, sumando los totales de tolos años pa cada mes, y dividiendo ente el total de díes nos que se recoyeron datos, esto va danos una idega que cómo se “comportó” pluviométricamente cada mes na dómina estudiada, vémoslu na gráfica:

Precipitaciones medies mensuales na dómina 1992-2002 en Castrillón (Asturies)

     Na gráfica vemos qu’anqueabril nun ye’l que tien mayor media de precipitaciones, pero destaca, ente tolos meses de primareva, branu y seronda, namás que lu pasen los caberos de la seronda y primeros d’iviernu. Paez que sí, que llueve abondo n’abril, polo menos en volume d’agua cayío.

     ¿Qué pasa col numberu de díes de lluvia? Mira la gráfica de frecuencies mensuales (o sía, el númberu de díes de lluvia en tola dómina, ente el total de los díes):

Frecuencia de díes de lluvia na dómina 1992-2002 en Castrillón (Asturies)

     Abril ye’l que más díes de lluvia tuvo, xunto con xineru y avientu, y mayu que vien tres d’ellos emburriando.

     Con estos datos delantre podemos afitar qu’esti refrán, ye perfiable, o yéralo, ya sabemos toos como ta’l clima nesta dómina, con un cambéu climáticu bien visible, polo qu’esta llenvancia puede haber camudáu, ya me prestaría poder comprobalu…

Comentarios