Desde los cursos caberos de la
escuela primaria toos sabemos que la velocidá de la lluz ye d’unos
300.000.000m/s, pa llegar a esti valor tuvieron que pasar munches décades de
investigación, con medides cada vez más fines. Güei fálase de 299.792.458m/s,
que ye un valor tomáu con equipos perprecisos. Pa nós, porcaces científicos amateur, nun
somos apurrir valores tán finos, anque con un poquiñín d’inxeniu podemos
arreglános pa tomar una midida con unos márxenes d’erru aceutables, como’l
métodu que voi cuntar agora, pal que namás necesitamos quesu, una riegla y un
microondes.
Una tarde, na que tuve entetreníu
iguando un fornu microondes d’un compañeru, esploré esti métodu pa midir la
velocidá de la lluz, qu’entá nun fuera probar (anque taba dando vueltes na mio
xíxara), por nun tener en casa un d’estos apartatos (nun mos gusta la comía acalecida
con ellos, que-y vamos facer). Que meyor manera pa probar si funcionada
l’aparatu que con un esperimentu…
Aprobechando qu’había unes raxes
de quesu d’Ozcos na ñevera, y que ya tinía fame, maté dos páxaros d’un tiru,
preparé merienda y midí la velocidá de la lluz.
Pa ello punxe’l quesu
estiráu nel platu del microondes, y como
necesitaba que nun xirase (llueu verás l’inquiz), saqué les aspes xirantories
nes que posa’l platu (ye tirar d’elles p’arriba, salen perfácil). Arranqué
l’aparatu 5 min. Lo que saqué foi esto:
El quesu amosaba una serie de
bultos, nésos yera onde la temperatura yera mayor, por que esos puntos ye onde
conflúin los frentes d’ondes del microondes, nellos superpónense les ondes
centrales y llaterales emitíes. Por eso
nun dexé que’l platu xirara, si lo ficiese estos puntos nun diben apaecer.
Ye perfácil venceyar la ralura
ente los bultos del quesu cola llonxitú d’onda, éstos son los máximos de la
onda:
λ=2L
onde L ye la ralura ente bultos de quesu.
Agora, camudamos λ por 2L na ecuación
siguiente y voilà, ya podemos saber
la velocidá de la lluz (c):
c=2Lf
onde f ye la frecuencia del microondes, que
suel ser de 2,45 . 109Hz (vien especificáu na placa carauterístiques
del aparatu).
Como tinía dellos bultos na
superficie’l quesu midí les ralures nel punto más altu, y calculé la media de toles midides,
6,1±0,1cm.
Polo que, tres pasar les midies a
metros, pude calcular c:
c=2*0.061*2,45.109=298.900.000m/s
Calculando l’erru esperimental, vi yera
namás que del 1,6%, o sía dientro d’unes bones llindes pa habelo fecho con un
métodu tan grebu nun ta mal, ¿eh?
Nin que dicir tien, que la
siguientefas del esperimentu foi, meter el quesu en pan, y comelu a una velocidá
mayor de la de la lluz. ¡Vaya fame que tinía!
Comentarios
Publicar un comentario