La xente de la mar tradicionalmente siempre venceyó la
color del cielu del atapecer y l’amanecer colos aconteceres meteorolóxicos
futuros, anque les son predicciones nun siempre son válides. Exemplu d’ésto foi
lo que pude recoyer nel conceyu de Gozón, y qu’asoleyé va años nel númberu 101
de Lletres Asturianes, nel artículu “Meteoroloxía popular n’El Cabu Peñes”:
-Si
al atapecer se ve’l cielo d’una color mariello llimón, al utru día llueva, si ta d’una color
encarnao, va facer bon tiempo: “Encarnao a poniente, bon día al siguiente”.
-Si amanez encarnao ye señal de
lluvia: “Alba roja, arremoja”.
[…]
-La color mariello (un mariellu
suavín, ensin llegar al del llimón) del atapecer anuncia aire.
[…]
-Color encarnéu fuíu: tiempo buino.
-Naranxa salmón: sol con aire
-Encarnéu:
xelá y depués bono.
Les lluces crepusculares más conocíes son les bermeyes de
l’amanecer y atapecer, pero según la presencia de polvu o ñubes n’atmósfera
puen apaecer colores mariellos y grises. Lo normal ye con un cielu llibre de
ñubes les lluces apaecen con tola so pureza, los camudes na color suelen ser
señal de presencia de polvu o humedá. Polo xeneral, los meteorólogos de campu
tomen la color mariello o blancuzo nel cielu como’l niciu d’un agafe del tiempo,
pero nun les tomen como un esquiciu fiable, lo mesmo que l’anuncia de bon
tiempo col color encarnao, que namás ye señal de bon tiempo cuando ta llibre de
ñubes (para saber más ver por exemplu a Roth, G. D. (1979) Meteorología. Ed.
Omega.).
Sacante l’usu como elementu de pronósticu, les lluces
siempre llamen l’atención de nueso, y apaecen por mor a la distinta forma na
que dispérsase la lluz nel cielu. Cuando pol día lléganos la lluz, vemos el sol
mariello, non blanco como debería ser, esto ye porque los componentes de la
lluz d’onda más curtia, son dispersaos pola humedá y polvo atmosféricos, que
son les que-y dan la color azul al cielu, mentantes que los componentes d’onda
llarga (mariello, bermeyo, roxo) pasen práuticamente ensin dispersión.
Cuando’l sol ta alto, la lluz tien qu’atravesar menos atmósfera
que cuando ta baxo (n’alborada o l’atapecida), asina que según va baxando, cada
vegada se dispersen más componentes de la lluz blanco, según tean menor
llonxitú d’onda (verde, mariello,
naranxa…), asina primero vamos velo, si’l cielu ta llibre de ñubes, roxu, y
dempués encarnáu. Si’l cielu tien presencia d’humedá o polvu, los colores van
camudar, según que colores se dispersen, por casu si hai muncha humedá, les
gotes d’agua que tán atmósfera van dispersar toles llonxitudes d’onda, polo que
va vese blanco. Esto que t’acabo de cuntar pue sonate a teoría de gabinete,
pero voi proponete un esperimentu percenciellu que va demostrátelo.
Montaxe del esperimentu, cola mio ayudante de llaboratoriu, la intelixente ya incombustible Pinkie Pie. |
Entá guardo en casa el mio proyeutor de diapositives, de
la dómina predixital; milenta veces pensé desfaceme d’él, pero siempre acabo
discurriendo daqué esperiencia que facer con esa fonte de lluz tán potente.
Asina que, otra vegada, baxé’l proyeutor del sobráu. El restu de preseos pa la
demostración, son bien cenciellos, un barreñín tresparente, una diapositiva,
cartulina negra, y lleche.
Monté la cartulina na diapo, y fice-y una raxa de 1mm. d’anchor,
col envís de que namás saliera una franxa de lluz del proyeutor (sinon tienes
proyeutor, pues probar con una llinterna potente, tapando’l focu, y faciendo-y
un furacu o una raxa a la tapa).
Al proyeutar la lluz, y facela pasar por barreñín con
agua llimpio, la lluz pasa talamente, y vamos ver na pantalla lluz blanco, pues nun va tener
nada que la disperse:
Si agora echamos el lleche, tres pingarates son abondes,
empuercando l’agua, al pasar la lluz va al traviés d’ella, va camudar la color
que vemos na pantalla. Al pasar la lluz al traviés del agua llechoso a lo ancho,
vamos ver la lluz más mariella:
Al pasar la lluz al traviés del agua tou a lo llargo,
la lluz va camudar a roxo:
Como ves un ye montaxe percenciellu, y del tou didáuticu,
perafayaizu pa deprender a los rapazos como apaecen los colores del cielu.
Comentarios
Publicar un comentario