Los efeutos del cambéu climáticu son bien sentibles, por casu
nes condiciones meteorolóxiques perdestremaes de los patrones normales, que
provoquen unes condiones anómales nel tiempu, tiempos de seca llargos,
tormentes pergafes, furacanes o temporales na mar de fuercia enorme.
Los caberos, tán
faciendo que la llinia mariñana recule, a lo que s’amesten los efeutos del
aumentu del nivel de la mar. Dicho recule ta medio pa munchos llugares, polo
que nun ye muncha la novedá lo que voi asoleyar, poro, paezme d’interés
rescamplalo, pues a mio tocóme velo a tiempu real, nos 15 años que llevo
viviendo en Bañugues.
El recule de la llinia
mariñana nun ye igual en toles faces, depende muncho de los materiales que la
formen, asina en llugares como la playa de Bañugues, nos que la frontera ente tierra y la llinia de
temporal ye una terraza arcillosa d’unos 3 metros de gordor, el recule faise
notar dempués de cada bagamar.
Por suerte, al poco d’entamar
a dir a playa de Bañugues, principalmente a ver páxaros, tamién entamé a
recoyer material toponímicu de la parroquia bañuguera, tema del qu’asoleyé un
llibru va años (Toponimia y folclore de
Bañugues). Nes visites a los llugares que fui viendo colos informantes, fui
faciendo semeyes y tomando apuntes de campu, que tenía guardaos en llibretes y
archivos d’ordenador. Gracies a éstos pude dir p’atrás nel tiempu, y pintar la
llinia de tierra fai 15 años, y calcular cuánto foi el terrén que comió la mar.
Nestos 15 años, la
xente pudo ver como les finques de La Ribera amenorgaron la so superficie, como
diben cayendo al sable de la playa cachos de muries, o árboles y xebes. Como taba
en peligru el xacimientu arquelóxicu qu’hai n’Aramar, y que por suerte, y
gracies al trabayu de la Asociación Cultural “El Curviru”, fízose una escollera
que lu protexe.
Nos planos que fice
arriendes d’estes notes y la imaxen actual, y que pongo darréu, pues ver la
superficie que comió la mar n’encarnao:
Na primer imaxen, por exemplu
na parte que ta tres de la muria, la mar comió una superficie de, como mínimu, 87
m2, reculando la mariña nel puntu máximu 6 metros y picu.
Nel planu segundu, la
superficie desaniciada foi mayor tovía, con más de 360 m2
desaparecíos, amás de la mayor parte de lo que nomen El Pedrogonón (que bien
ceo desaniciará enteru), nesti llugar el recule máximu foi de 10,5 metros, una
pollinada de metros.
Con esti panorama tán
desolador, nun puedo parar de pensar cuál sedrá l’escenariu nos años que
vienen, pues los efeutos presumiblemente van dir a más, o polo menos van caltenese. ¿Cuánto más va recular? ¿Qué pasará nun escenariu d'aumentu del
nivel del mar? Esta zona concreta ye una gran llanada, que garra poco desnivel
a lo llargo del cauce del Ríu L’Arena (la cartografía oficial diz Arroyo
Llantada), que nun pasáu llonxanu formaba un estuariu en Bañugues. ¿Volverán a
inundase los praos que suben hasta san Jorge? Seya como seya, los daños
naturales, humanos, materiales y culturales van ser pergrandes.
Comentarios
Publicar un comentario