¿Qué come'l "Búho piquiñín?


   Nun se cuála ye la razón pola que la mio fía de cuatro años tien interés especial no que comen los animales, polo que siempre ta entrugándome qué come tal o cual bichu. La dieta de les especies del mio entornu ye una cosa que siempre m’interesó, polo que nun supón nengún disgustu pa mio que me faiga eses entrugues, ye más, puede que seya’l mio interés el causante del suyo, o non.
   La cosa ye que un día de camín pala escuela vimos asoleyándose nun bistechu a la miagona (Athene noctua) que vive nos alredores de casa, y qu’ella bautizó como’l “búho piquiñín”, destremándola de la curuxa (Tyto alba) que tamién vive a la vera casa. Dempués de mirala un cachín, y de la que díbamos caminando entrugó:
      -¿Qué comé’l “búho piquiñín?
      -Buf, munches coses –retruqué yo-: saltapraos, grillos, vacallories, furgaños, mures, llargatexes, topinos…
      -Vaya fartonín, ¿non? –sentenció ella, conforme cola respuesta.
 
   Yo quedé cavilando, pues la verdá que a grandes rasgos esa ye la dieta, pero ¿en qué percentax apaez cada presa? ¿Qué amesta caúna a la biomasa qu’inxeré? Paecióme una bona entruga pa folgar tola mañana.
 
   Llevo más de 15 años esbillando egagrópiles d’aves, principalmente de curuxa, de la que teo analizaes más de 10000 egagrópiles. Anque tamién teo bones muestres de miagona, cárabu, córvidos, aves rapiegues y munches más. Asina que colo que teo en casa valió bien de sobra pa resolver la respuesta.

Egagrópiles de miagona nun posaderu de la campiña de Gozón. Vense perbien los güesinos de mures y topinos.

    Tenía un total de 3328 preses atopaes nunos cientos d’egagrópiles de la contorna gozoniega, n’hábitat rural y campiña. La tabla resume tolo qu’atopé:

 
   Como pues ver, el percentax mayor gárrenlo los inseutos, que representaben cuasi’l 95% de les preses, mentantes que los mamíferos componíen menos del 5%, y foi testemoñal l’apaición de llargatexes. Asina que nuna primer güeyada los “búhos piquiñinos” son inseutívoros. 

Pieza bucal de saltapraos, niciu que suel apaecer nes egagrópiles de miagona.
 
   Poro, bien de sobra sabía, de los trabayos que fici cola curuxa, qu’el percentax de les preses munches vegaes nun ye una representación real de lo que supón una triba de presa pa la dieta global, pues nun ye difícil ver que pa la miagona supón más amesta d’enerxía comer un mur caseru qu’una vacalloria. Por eso, col envís de conocer cuánto amestaba cada triba d’alimentu decidí facer un cálculu de la biomasa qu’amesta caúna de les preses.
   Pa calcular les biomases podemos atopar tables au asignen un valor mediu de la biomasa qu’aporta una triba de presa concreta, polo que namás tenemos que multipiclar esti valor al númberu de preses d’esa triba. La situación camuda muncho, al calcular lo que aporta cada clas de presa la romana bascula pal llau de los micromamíferos, ye dicir, amesten muncho más a la dieta, pues velo desglosáu na tabla:

 
   Si les tables t’allorien vese más nidio nes gráfiques de sectores:


 
   Viendo l’asuntu en términos de biomasa valieron más 59 mures que 2082 saltapraos. Ye más, lloñe lo que podíamos cuntar a lo primero, los micromamíferos amesten más de la metá del alimentu a la miagona. Entós, ¿por qué nun come más mures, y dexa d’andar espitucando polos praos a la gueta saltapraos? Lo más cenciellu ye que tea que ver con un efeutu estacional. Sabemos perbien que la especie ye abondo xenerallista, y que garra los recursos que más fácil se-y apurren, asina cuando abonden los saltapraos, pues come saltapraos, y cuando abonden o se-y presenta la oportunida paña mures. Sofita esta tesis el fechu de que un 70% de los inseutos atopaos son d’egagrópiles pañaes en primavera y branu, y casi un 60% de los mamíferos ente la seronda y l’iviernu. 

 
   Un datu chocante, anque esperable, si facemos comparanza coles dietes de les miagones centroeuropees (onde la dieta ye a base de mamíferos) y del sur d’España (la dieta ye a base d’inseutos) vemos que les de Gozón tán a mediu camín de les dos, nin tou micromamíferos nin tou inseutos, sinon que cuasi 50 y 50% pa caúna.

Comentarios