Una de les implicaciones de la
relatividá xeneral na forma de ver la realidá ye qu’en presencia d’un campu
gravitatoriu l’espaciu (y el tiempu) cúrvase, ye un efeutu, que suena chocante,
pero que puede oservase mirando les estrelles mesmamente. Tamién nótase, desde
va poco dempués de deteutar les ondes gravitatories, nos efeutos que tien na
gravedá. Voi centrame nes primeres, que son les que quise “estudiar” con una
lente gravitacional casera.
La lluz tien la sana costume de
tirar siempre pol camín más curtiu, nel casu d’una superficie curva la lluz va
siguir la xeodésica, que ye la llinia más corta posible que pue trazase ente
los puntos afincaos nuna superficie curvada. Asina que nun espaciu curvu por
mor de la presencia d’un oxetu masivu, la lluz que, por casu, vien d’una
estrella, va vese obligada a camudar el so camín, y la imaxen que vamos ver
sedrá una distorsión de la realidá, per aciu al efeutu lente gravitacional.
Les lentes gravitacionales faen
un efeutu asemeyáu al d’una lente convexa normal, anque, además d’otres coses,
destremen en que les lentes convexes desvíen la lluz averada’l borde de la
lente más que la que ta más averada’l centru d’ella, converxendo toes les
trayeutories nun puntu, el focu; mentantes que na gravitacional la lluz nel “borde”
desvíase menos que la que pasa más averada al centru, polo que nun apaez un
focu, lo que vamos ver son delles distorsiones:
-camude de la posición aparente
del oxetu, polo que, por casu, una estrella que tien una posición concreta nel
nueso cielu, en presencia d’un oxetu masivu, va apaecer n’otra posición.
-ampliación del tamañu aparente,
nesti casu fae’l mesmu efeutu qu’una lente normal.
-deformación en forma d’arcos,
semicírculos o aniellos
-multiplicación del oxetu, polo
que veremos delles “versiones” del mesmu.
Einstein ya predixo esti efeutu,
pero nun cuidó que los efeutos diben ser lo bastante grandes pa poder
oservalos, quedó como una implicación chocante de la so teoría, poro en 1919
pudo midise, por primer vegada, que la desviación de la lluz d’una estrella al
pasar a la vera’l Sol, que taba clisáu nesi momentu, yera d’unos 1,75’ d’arcu. En 1979
acabante de descubrir un sistema de dos cuásares, práuticamente idénticos,
cayeron na cuenta que nun yera posible, taben delantre de los efeutos d’una
lente gravitatoria. Esti efeutu ye perimportante tamién como preséu p’atopar
por casu planetes qu’orbiten alredor d’estrelles llonxanes.
L’efeutu que faen estes lentes
paezme perinteresante, y nun canso de ver imáxenes de cuerpos celestes
distorsionaes pola masa d’otros cuerpos (internet ye la de coyer pa estes
coses); pero tomar semeyes del efeutu pa un amateur porcaz como yo ye
imposible, asina, que “a falta de pan, boroña”, cavilé como arreglámeles pa
simular les deformaciones que producen les lentes gravitatories, gastando namás
2,15 euros, que foi lo que costó una copa de cristal nun bazar chinu. Con un
poco de cuidáu corté’l cuellu de la copa (fui llimando too alredor d’él, hasta
que rompió solu). La base de la copa sedría la mio lente gravitatoria, pues la
distorsión que-y fae a la lluz ye asemeyada a la d’una lente gravitatoria.
Pa ver los efeutos namás tuve que pintar un puntu, que representa la
fonte de lluz, nuna fueya, y poner el culu la copa enriba pa ver los diferentes
efeutos, qu’amoso darréu.  |
|
La “estrella” ensin los efeutos
de la lente gravitatoria
|
 |
|
Equí vemos un efeutu de
desplazamientu
de la posición real del oxetu
|
 |
| Arcos d'Einstein reales y simulaos |
 |
| Aniellu d'Einstein real y simuláu |
La verdá que foi prestosu enredar
un cachu cola copa, anque por muncho que la moví nun fui quién a ver una Cruz
d’Einstein:
Pero eso ya yera pa nota...
Comentarios
Publicar un comentario