martes, 19 de septiembre de 2017

Desarmando un ñeru



Llevaba díes sollerte a los dires y vinires d’una pareya xilguerinos, que dempués de sacar una primer ñerada, volvieren entamar con otra segunda. Tuvieron dellos díes enguedayaos faciendo un ñeru nuevu, que yo de xemes en cuando miraba (desde lloñe) como diba. Amás atopábalos na mimosa garrando ramines, o sacando rellenu de poliester d’una chaqueta vieya. Foi perprestosu velos trabayar. 


Cuála foi la mio desilusión cuando una tarde, atopé’l ñeru, práuticamente fechu ya, tiráu en suelu. ¡Qué pena! Traté d’engolalu nel pinu d’au cayera, pero a los dos díes los paxarinos nun volvieren pa él, y taben intentándolo otra vegada, asina que baxelu, y llevelu pala mesa de trabayu. 
El ñeru de xilguerín nel suelu baxo'l pinu.


La verdá que vaya guapu y perfechu que taba, un trabayu perbonu. Les ramines de mimosa y otres yerbes entetexíes con distintes frebes daben-y al ñeru una tiez plasmante.
Tenía un ratín de folgancia, asina que desarmé, pieza por pieza, la obra arquiteutónica, y atopé dalgunes coses percurioses.


El gruesu de la materia prima yeren fueyes de mimosa, cunté un mínimu de 253 ramines, que si tornamos a númberu de viaxes a la mimosa, que ta a unos 150 m. d’onde taba’l ñeru, son alredor de 76 km. 

Tola fueya mimosa que pañaron los xilgueros

Amás de la fueya mimosa, había una cincuentena de ramines de yerbes de delles tribes, más dures y enterices, que pamique escoyeron adré pa da-y más cuerpu.

Estes raminesdaben-y tiez a la estructura

Toes eses rames y fueyes, nun taben namás texíes como un sardu, sinon que taben entemecíes con febres, d’una forma tan enguedeyosa que costo muncho destremales de la material vexetal. La mayoría d’estes frebes yeren d’orixe humanu, más que nada poliester, que como dixe, fueron sacando del rellenu d’una chaqueta vieya, pero tamién había filtros de cigarros desarmaos (pa daqué teníen que valer eses porqueríes), vilanos de xiblata (Taraxacum officinale, qu'en mio casa nomamos tarriella), telarañes y dellos filos encarnaos. 

Les nantes humanes tamién yos-valen, como'l poliester d'una chaqueta vieya, o filtros de cigarros

Ye plasmante la de material que formaba’l ñeru, que separtáu cuadruplicaba’l volume del ñeru montáu. Nun soi quién a imaxinar la de trabayu que-yos debe llevar dir cosiendo y recosiendo ramina a ramina, freba a freba, pa conseguir facer d’una montonera de material una obrina d’arte como esa.

Postdata: los xilguerinos ficieron otru ñeru, y sacaron otra ñerada.

domingo, 10 de septiembre de 2017

Una hestoria de pantasmes



            Como amante de la ciencia soi perescépticu, por eso nun trago una sola hestoria de pantames, estraterrestres y otres falacies como l’adivinación, los amuletos, bruxería... Anque va dellos años tuve una esperiencia que cuando menos despertó la mio curiosidá, por tratase dalguien averáu, asina que vime implicáu nuna Hestoria de pantasmes.


            Anque bien sabía un collaciu lo que pienso sobre los temes paranormales, vieno a veme pa cuntame dalgo que taba pasando na so casa, y que tenía a él a la so muyer en tensión continua. Creyíen que teníen un pantasma en casa, y quería face-yos la vida imposible. Esi iviernu, en cuantes que llegaba la nueche, mentantes durmíen, poníase-yos un pesu na pechera, que-yos facía puxu, una opresión que foi a más, y la so muyer teníalu dafechu, tol día. Amás tamién sentíen chasquíos y pitíos pela casa. Taben cagaos. Ya probaren a pasar l’agua, a ufrir mises, y chando agua bendito pela casa, y nada. La muyer taba nun ris de volvese lloca, y el mio collaciu taba fundíu:

            -Ties que vinir a casa, nun sabemos que facer ya. Tamos aburríos –dixo desesperáu.
            -Ya sabes que nun creo neses coses, que voi facete yo.
            -Por eso, tu nun crees, a la meyor a ti gárrate miéu, yo que sé. Por favor, ven.
      
              Enxamás viera al mio collaciu asina, polo que fui a la so casa esa mesma nueche.

          Cenamos lo más tranquilamente que pudimos, por que aquella xente taba desencaxao, y dempués, como yera iviernu, quedamos na cocina a la calor del fueu.
            -Bono, que hai qu’esperar a les doce, o apaez según y-da.
            -Nun ye de risa – remuñó la muyer del collaciu. – Cuando lo sientas vas creyelu.
            Pasaba’l tiempu, pero yo nun sintía nada, o sí. La vista taba anublinándoseme, el mio collaciu entamó a lloriquiar: -Ya ta, ta equí. ¡Marchá! Déxanos en paz, rediós. –Glayó cola mano nel pechu.
            Coime, paez que yo tamién taba sintiendo daqué, un puxu nel pechu, que cuasi dolía, amás sentíame un poco mareáu. Nun podía ser, ¿taba esi pantasma de verdá ente nós? La muyer dixo que si nun sintía los chasquíos, ella diba poco que taba escuchándolos. La verdá que nun llegué sintir nada, porque nesi momentu vi les coses bien nidies: -Toos fuera, vamos pa mio casa.
            -¿Qué pasa? Ties miéu... – dixo’l collaciu.
            -Sí, pero non a los pantasmas, ya se lo que pasa equí. Vamos.
  
          Nun-yos quise dicir lo que yera, hasta l’otru día (había que caltener el misteriu). Díbamos volver a la gueta’l mostruu, pero esta vegada equipaos.
   
         Al día siguiente volvimos pol día. Entramos callaos en casa, ellos atristayaos y sobrecoyíos, yo confiáu.
            -¿Pues preparar un poco café?- dixe al mio collaciu.
            Atizó la cocina, qu’entá siguía encesa, y punxo la pota col café a ferver. Averéme a la cocina, y metí otra paletada de carbón.
            -Mete-y bien de carbón a esta cocina, como ayer de nueche - dixe yo.
          Entós saqué’l mio arma anti-pantasmes de la mio fardela, un detector de monóxidu de carbonu, que me dexara un collaciu que trabaya en prevención de accidentes llaborales, pues taba convencíu que tou’l problema yera por mor a una mala combustión na cocina, que facía que la concentración de CO2 aumentase.
Por mor que llevo trabayando desde siempre na industria, se abondo de los efeutos que produz el monóxido de carbonu, que ye un velenu pergafu, y que pue producir la muerte ensin enterase. En concentraciones non mui altes, pue dar mareos, dolores de cabeza, dolor y presión nel pechu, hasta pueden sentise acúfenos (chasquíos y pitíos).
            Púnxelu a midir na mesa la cocina. Los mios collacios punxeron cara rara: -Qué faes, qué ye esi aparatu.
            -Ye lo que va desenmazcarar al pantasma de vueso, nun ye un caza-pantasmes, sinon un mididor de monóxidu de carbonu. Pamiqué esi pesadiellu que-vos prime’l pechu y los acúfenos qu’oyiéis, yeren producíos por una intosicación sele de CO2.
            A lo primero, nun yeren creyelu, pero en cuantes vieron como subía la concentración de monóxidu de carbonu na cocina, empezaron a cayer de la burra. Nun dexé que llegase a  midir valores de concentración peligrosos, polo que cuando tuvieron convencíos abrimos les ventanes, dexamos morrer la cocina de carbón. Ya nel ordenador, pudieron ver ellos mesmos los efeutos que produz la intosicación por esti gas, polo que tamién cayeron na cuenta qu’acababen de salvar la vida, asina qu’invitáronme a una  bona xinta pa celebralo.

            Nin que dicir tien, que’l pantasma enxamás volvió, anque’l dolor de pechu sí volvió, cuando vieron la factura del albañil que-yos iguó la cocina.

sábado, 18 de marzo de 2017

Marcando'l territoriu de forma rendable

   Ya falé delles vegaes de Perro, el compañeru canín que vive con nós. Ye un milraces, que rescatamos de ser lleváu a la perrera cuando apaeció na industria au trabayo. Llevámoslu pa casa con mires d’atopa-y un llar, atopamos-ylu bien ceo, la nuesa casa… Tien un carauter perespecial, pues ye un poco “pasota” si se-y mete dalgo na tiesta, como dir a goler daqué rastru, o llamber los gatos hasta dexalos pingando. Son zunes que tien que nun fuimos desaniciar, que-y vamos facer… Otra de les zunes que tien, esta y-debe vinir de familia, ye marcar el “so territoriu” dando-y bona renda a los sos escrementos, cuéntotelo agora.



   Toos sabemos que los perros marquen el territoriu col mexu y les cagaes, esto dase en munchos carnívoros, qu’afiten el so territoriu de caza cola gabita de los sos desechos.        Dempués de tantos años con Perro, y tolos paseos que tenemos nes pates, un día cayí na cuenta, al lleer un artículu sobre cómo marca’l raposu’l so territoriu, que Perro lo mesmo siguía esta téunica: cagar nes forcaes o cruciaes de los caminos, maximizando la rendabilidá de los sos escrementos, pues ye más fácil que pasen otros conxéneres, a los qu’hai qu’avisar qu'entren en terrén de Perro, per una cruz de caminos que per un camín llinial. Faciendo memoria dábame cuenta de munches cruciaes que solemos pasar onde tien fixación por cagar, y quedar goliendo como un llocu una mata o una piedra. La memoria puede xugátela, y cómo científicu amateur, nun me quedó otra qu’aplicar el métodu pa salir de dubies.
   

    Lo que fice foi percenciellu, a lo llargo de 6 meses apunté’l númberu de cagaes y áu les facía, en camín llinial o nuna forcada o cruciada, cuntado qu’esto asocedía siempre que tuviera nun radiu de 30 m del centru de la cruz de caminos, tamién apunté a qué distancia del centru de la cruciada taba. Los paseos  na so mayoría fueron per caminos de montes y campiña, y carreteres, a lo llargo de, más o menos, 905 km (ya anda Perro, eh).

   Los datos qu’atopé a lo llargo'l mediu añu (n=760) vémoslos na gráfica d’abaxo:


   D’una güeyada a la gráfica vemos que Perro tolos los meses cagó más vegaes en cruciaes que en tramos lliniales, en total el 65,26% de les cagaes fízoles en forcaes, frente al 34,74% en cachos reutos. Ya sabes que’l güeyu engaña, y l’azar xuega males pasaes, asina qu’apliqué un test estadísticu con que dar sofitu o refugar a la suposición de que prefier marcar el so territoriu, coles cagaes, nes cruciaes. Use’l test G, que ya usara cuantayá pa saber si la distribución de los colores de los “Lacasitos” yera uniforme o non, asina que nun  voi repitir cómo se calcula, si ties interés encamiéntote a lleer aquella entrada (pimpam cunta lacasitos). ¿Qué ye lo qu’atopé? Pues, que sí, Perro prefier marcar cola so caca nes forcaes (por ciertu, el nivel de significación que garré, foi perbaxu, 0,1%, esti percentax ye’l grau nel que la distribución atopada puede debese al azar, o sía, perpoquísimes posibilidaes).

   En cuanto a la distancia desde el centru de la cruciada y el llugar onde llantó la marca, na gráfica vemos qu’hebo una tendencia a faceles más bien averaes a la posición central de la cruz de caminos (vemos que tán correlacionaes de forma positiva, o sía hai más cagaes cuanto más averaos al centru):


   Con estos resultaos, fui a la bibliografía, a la gueta d’estudios asemeyaos al que fice, pa ver si socedía lo mesmo n’otros carnívoros, nesti casu xabaces. Ablucante lo qu’atopé: los llobos faen lo mesmo (artículu patrones de marcaxe de llobu), l’estudiu que consulté daba una proporción d’alredor de 60% vs 40% (Perro 65,26% vs 34,74%), los autores esplicábenlo na busca de maximizar la redabilidá del marcaxe con un recursu tan rescamplante, y escasu, como son les cagaes (dan muncha golor, caltiénense más tiempu nel mediu…), Perro paez que tien tendencia a facer lo mesmo. Por eso dixe a lo primero que a Perro, marcar el so territoriu cola máxima rendabilidá y-vien de familia, llonxana, pero de familia.

   Ya ves, les zunes  de Perro tamién dan xuegu pa facer daqué cienzuca d’andar per casa.

domingo, 19 de febrero de 2017

L'inquiz de cuntar paxarinos: el transeutu, un métodu cenciellu pa cuantificar la densidá d’aves

   Los ornitólogos tamos avezaos a los censos d’aves acuátiques, que son perinteresantes por que dan conocencia de la población a nivel llocal. Los recuentos o censos “totales” del númberu d’aves d’una zona húmeda son cenciellos, anque dacuando aburribles, y tán al algame de tolos paxareros con un mínimu de formación. N'otres tribes d'aves, sobremanera los paseriformes, esta cuantificación nun se lleva a efeutu, por esistir un desconocimientu de la densidá d'aves de munches families y en munchos medios, y apaez la entruga de si nun esiste dalgún métodu cenciellu y que nos dea información sobre la densidá d'aves nel espaciu, y nel tiempu na que podamos tener enfotu. El retruque ye afirmativu, esisten dellos de gran utilidá y cencellez, pero de toos ellos yo voi a cuntáivos el métodu que llevamos usando dende fai más de diez años na localidá onde moro, el transeutu o itinerariu de censu, col que de forma cenciella, y con poca brenga, llogramos unos datos de gran interés, siquier pa los mios propósitos.



   La base del itinerariu de censu o transeutu nun ye otra que facer un percorríu a velocidá de marcha baxa (2-3 km/h) anotando les aves que vamos atopando, col númberu d'aves y la distancia calculamos l'Índiz Kilométricu d’Abondanza (IKA), que ye una midida de la densidá relativa d'aves (aves/km). A les traces esti ye’l métodu, pero pa ser un pocu más rigorosos tenemos que siguir una serie de pautes, que traten de uniformizar los datos llograos colos que tomen otros oservadores o investigadores.
   ¿Cuáles son les pautes que tenemos de siguir pa facer un transeutu d'alcuerdu otros observadores? La primera débese a un efectu estadísticu, tenemos de caltener la velocidá siempres constante, con cuenta de que toes les aves presentes tean les mesmes probabilidaes de ser atopaes. Tenemos qu’evitar, per otru llau, los dobles contautos, en principiu polo tanto nun vamos anotar les aves que nos devasen dende tras, o nos pasen dende alantre escontra tras. Otru puntu importante ye la distancia del percorríu, esta tien que ser lo bastante llarga pa evitar el llogru de densidaes bien alloñaes de la realidá, y que nun dependan del llargor del percorríu, la distancia va camudar según el mediu nel qu'atopemos, asina pala la campiña atlántica o de la mariña central d’Asturies, investigaciones n’Asturies dan qu'un percorríu de dos km ye abondo pa llograr una descripción fiable de la comunidá d'aves d'esi mediu, pa otros medios va variar, anque creo que dos km ye una distancia de la que nun tendríamos qu’alloñanos demasiáu. Tamién podemos destremar el llargor en tramos de 500m, por casu, pa calcular los índices parciales.
   Polo habitual, l'hábitat onde se fae'l percorríu tien que ser uniforme, anque según los nuesos propósitos non siempres tien que ser asina, pues el nueso propósitu por casu puede ser cuantificar el númberu d'aves d'un territoriu concretu contemplando una amuesa de tolos hábitats qu'apaecen nél, col fin de comparalu con otru territoriu, esta opción por tanto va depender de los fines del oservador.
   L'horariu ye tamién un puntu que nel qu’hai una pauta, polo xeneral, tien que realizase ente la salida del sol y dos hores siguientes. Sicasí, ye daqué que por casu el naturalista que deseye tomar datos ensin necesidá d'enforma rigor puede resalvalo, amás delles especies son menos “madrugadores” o más “friolentes” qu'otres, polo que d'una forma o otra los datos pueden apaecer sesgaos, asina por casu l’IKA del saltón (Cisticola juncidis) nun mesmu itinerariu de 2,4 km. camudó de 0,42 aves/km nel amanecer d'una mañana de xineru, a 2,96 aves/km a les 12 d'esi mesmu día, mentantes que col raitán (Erithacus rubecula) asocedió lo contrariu al alba deteutáronse 3,33 aves/km y 0,42 a mediudía. Yo, sacantes que tea faciendo un estudiu concretu o nel itinerariu que faigo toles selmanes nel campu Bañugues dende 2002, nun m'esmolezo muncho pela hora, anque suelo refugar de facelos nes hores centrales del día, y trato de facelos pela mañana, anque prefiero facer un transeutu a media tarde que m'informe del númberu averáu de raitanes que llegaron nuna cayida serondiega masiva, que contentame con apuntar nel cuadiernu de campu qu'había munchos raitanes; al revisar los datos de campu atrasáos daste cuenta de lo que val ver que na entrada de 2011 yeren 22 aves/km y en 2012 había 67 aves/km, en dambos casos son munchos raitanes, pero les cifres numbériques destremen enforma.
   El tiempu atmosféricu tamién frada’l resultáu, nun tenemos de facer transeutos mientres llueve o cuando sopla aire, sinón los nuesos datos va tar condicionaos por ellos.   
   Cuando apurrimos datos procedentes de transeutos ye recomendable qu'indiquemos el llargor del percorríu y el mediu, o bien el númberu d'aves y ente paréntesis l’IKA: 26 aves (IKA=5,82).
   El transeutu podemos completalu col taxiáu, nel qu'establecemos una banda de 25 m a cada llau del percorríu, anotando les aves que tán dientro d'esa banda, lo que va dexanos tener el númberu d'aves per unidá de superficie, en cuenta de aves/km, tien el problema de refugar hasta'l 80% de los datos que llograríamos col transeutu, sicasí nun nos cuesta nada facer dos columnes nel cuadiernu de campu y anotar les aves de dientro de la faza de 50.pal cálculu del númberu d'aves por km2, y éstes más les de fuera pal cálculu del IKA, va servite pa comparar los tos datos colos de otros oservadores.    

   ¿Cuálos son los beneficios que llogra l'ornitólogu aficionáu al usar esti métodu? Tolos ornitólogos tamos acostumaos a ver gráfiques del númberu d'aves censaes en tal o cual embalse, ría o playa, pero son raros los gráficos onde se nos amuesa’l númberu d'aves terrestres a lo llargo l’añu, en parte entiéndese pol fechu de que nun ye lo mesmo cuntar toles aves d'una llaguna o un estuariu que cuntar toles aves d'una gran estensión de terrén; los transeutos pueden aforranos muncha brenga, y danos dellos prestos, pues con facer unos pequeños percorríos fixos de forma habitual vamos llograr una midida bien averada a lo qu'asocede na realidá, por casu, nel gráficu que vemos debaxo podemos reparar como camudó'l númberu de chis de los praos (Anthus pratensis) nun transeutu de 2,35 km nel campu de la llocalidá de Bañugues en 2012. Na gráfica podemos ver bien definíos los picos del pasu primaveral y serondiegu, la entrada d'aves en foles de fríu de xineru, l'ausencia d'aves branices.



   Otra utilidá del transeutu ye la de poder cuantificar la densidá de territorios d’añerada d'aves, basta con rexistrar el númberu de territorios de cría d'aves o de grupos familiares en vegada, o al empar, del númberu d'aves por km. Nel siguiente exemplu podemos ver el númberu mediu de territorios de cerrica (Troglodytes troglodytes) atopaos en dellos transeutos en distintos medios nel términu municipal de Gozón, lo que danos una idea de les preferencies d'esta especie ubiquista.


    Les posibilidaes son munches, casi tantes como entrugues puedan asocedenos sobre la densidá del númberu d'aves nun territoriu, la so variación o la comparanza cola d'otros llugares. Esti métodu ye de gran utilidá, non yá como mediu d'investigación ecolóxica, sobre lo que yá aldericaron investigadores de sonadía, sinón como mediu de conocencia del ornitólogu aficionáu, y como preséu de cara a conocer l'estáu de les comunidaes d'aves con mires al caltenimientu o de cara al siguimientu de los efeutivos d'una determinada especie o grupu d'especies. Pamique motivos nun falten pa entamar a transeutar. 





jueves, 2 de febrero de 2017

Midiendo la Tierra con un palu, o de cómo midió Eratóstenes la circunferencia de la Tierra

   Nel mio primer añu de secundaria tuve dos mayestros que ficieron enanchar enforma’l mio interés pola ciencia, una foi la profesora de “Ciencias experimentales” (nomabase asina l’asignatura), Josefina, que supo despertar el pruyir pola ciencia de mio y de munchos de los mios compañeros (dellos a lo cabero tiraron per rames de ciencies, gracies a ella). Fízolo, nun sólo faciendo que’l temariu fuese comprensible a toos, sinon presentándonos a otru profesor, que pa mio foi un fitu, un antes y un dempués na mio forma de ver el mundu. Esti profesor foi Carl Sagan, con Josefina asistimos, a través del video VHS, a les sos clases maxistrales, los capítulos de la serie Cosmos, nes que repasa nun sólo la hestoria del Universu, sinon la hestoria de la ciencia, y del ser humán, un exerciciu de comprensión y síntesis de qué, quién y porqué somos.

   Esa serie fexo güelga en mio, tanto que fíceme, a pocos, con tolos capítulos de la serie, un esfuerzu pergrande pa la economía d’un rapazón de 13-14 años, y llegué a deprendelos cuasi de memoria. De les estayes más presotoses, pami, ye’l Capítulu 1, pues ye nel onde fala como, nel sieglu 3 anties de la nuesa era, un home de ciencia midió la circunferencia de la Tierra con una exautitú plasmante, valiéndose namás de palos, solombres, pies y la so cabeza, yera Eratóstenes. Va prestame relatar esta pequeña gran hestoria.

   Eratóstenes, amás de filósofu, xeógrafu, hestoriador, matemáticu o astrónomu, yera direutor de la biblioteca más importante qu’enxamás hebo na hestoria humana, la Biblioteca d’Alexandría (n’Exiptu). El mesmo Sagan lloraba la perda de la biblioteca, n’otru capítulu de la serie, pol desaniciu de tanta información sobre’l mundu antiguu, escrita polos propios partícipes, y pola cantidá d’obres destruyíes de los grandes del pensamientu d’aquella. Della namás quedaron, según el mesmo Carl, “dellos fragmentos que namás nos valen de tormentu”.

   Bono, la cosa ye qu’Eratóstenes, somorguiando ente los papiros, atopó un datu que-y pareció rescamplante, lloñe, nes fronteres meridionales, en Siena (güei Asuán, Exiptu), socediá que’l 21 de xunu, el solsticiu de branu, a mediudía cualesquier oxetu vertical nun proyeutaba nenguna solombra, y no fondo d’un pozu reflexábase’l Sol, ye dicir, el Sol taba no más alto del cielu, enriba les cabeces.

   Yera un fechu curiosu, y Eratóstenes, quiso ver si n’Alexandría tamién yera asina, polo que nel siguiente solsticiu de branu, a mediudía, miró si los oxetos verticales daben solombra. Socedió dalgo que fadría cavilar a cualesquier persona con curiosidá, los palos y columnes d’Alexandría, nel mediudía del 21 de xunu, daben solombra, ¿cómo podía ser?, ¿cuntaría mentira’l papiru que falaba del socesu en Siena? Naide diba mentir neso, había una respuesta pa too ello, la Tierra yera redonda, y non plana. La cosa ye cenciella d’atalantar.Con una Tierra plana, les solombres en tolos llugares, a la mesma hora y mesma fecha, tienen que ser igual de grandes, pues los rayos del Sol lleguen a la superficie paralelos, si ta vertical nun darán nenguna, si ta baxo una solombra llarga, pero siempre del mesmo llargor. Mentantes que con una Tierra curvada, redonda, los rayos, que siguen llegando paralelos, van dar solombres distintes, pues los oxetos verticales van tener inclinaciones destremaes. Nun yera nueva la idea de que la Tierra yera redonda, pero Eratóstenes, con estos nuevos datos, foi quien a midir cómo de grande yera esa esfera, el planeta Tierra.

   Ya dixe que yera matemáticu, polo que sabía perbien que cuando dos reutes paraleles son cortaes por otra reuta, los ángulos interiores alternos son iguales (ver imaxen), asina que sabiendo’l ángulu que formaba la pica d’un palu cola solombra de so, n’Alexandría, podía saber l’angulu ente Siena y Alexandría, que resultó ser d’unos 7º.


   7º ye la 51,43ª parte d’una circunferencia, polo que sabiendo la distancia ente Siena y Alexandría, podía conocer lo que midía la Tierra entera. Asina que contrató a un paisanu pa que midiera esa distancia, en pasos (vaya trabayu). Eratóstenes naguaba por que volviera l’home de vuelta, cola distancia, que resultó ser d’unos 800 km. Polo que la circunferencia de la Tierra midía, según los cálculos d’Eratóstenes, 41142,86 km (800 por 51,43). Los datos actuales dicen la circunferencia terrestre ye de 40076 nel so puntu más anchu, nel ecuador (ente polos ye menos, 40009, por que ya sabes que ye achaplada pelos polos), polo que pamidea que nun ta nada mal esi primer averamientu que fexo Eratóstenes, namás un 2,7% d’erru, sobre too si pensamos qué medios usó.

   Asina, más o menos, foi cómo lo contó Carl Sagan na so serie, la realidá ye que nun fue asina del  too, según qu’autor la distancia que midió Eratóstenes ta ente 39614 y 46268 km, polo que’l erru varía ente un 1% y un 15%, según la equivalencia que-y demos a la unidá de midida qu’usó Eratóstenes, poro, inda col erru del 15% el fechu ye plasmante.

   L’envís de Carl Sagan, yera rescamplar el fechu que la ciencia aforteca na curiosidá, en facese entrugues, y dir a la gueta’l retruque d’elles (con l’aída del talentu y la suerte), y pamique consiguiólo perbien, y sirvió pa encaminar a munchos peles siendes de la ciencia, bien como profesionales, bien como amateurs porcaces, que disfruten con pequeñes esperiencies tolos díes.

jueves, 19 de enero de 2017

Les otres matemátiques: triangulando la relatividá



   Va tiempu que nun m’alcuerdo de les lleiciones del mayestru de mates Toño, asina que, gracies a un videu que vi va dellos díes, que m’alcordó una d’eses lleiciones, voi relatar la vegada que deprendiónos una manera diferente de ver la ecuación básica de la relatividá.


   Yera mayu, el día soleyeru, y la hora cabera de clase del vienres, polo que, hasta pa mio, la clase de mates taba faciéndose llarga. Esto violo Toño, asina que dempués de resolver un exerciciu, posó la tiza, y dixo:


   -Ya distis la relatividá en física, ¿non? Pamique sabéis la fórmula famosa, E=mc2, ¿non?
   Pues tenéis que saber qu’esa nun ye la ecuación verdadera, esa namás ye una solución pa un casu concretu, en realidá la verdadera ye: 


E2= (mc2)2+ (pc)2


 au m ye la masa, p el momentu llinial (magnitú qu’espresa la cantidá de movimientu d’un oxetu) y c la velocidá de la lluz (la “c” significa celeritās, en llatín rapidez).

   Non, nun vois soltavos un rollu de física, nin vamos a ponenos a integrar nada. Sabéis que siempre digo que la xeometría puede enseñanos munches coses, namás que razonando. ¿Qué veis nesa ecuación? Espero idees a lo llargo de diez segundos…


   El tiempo pasaba sele, en  silenciu, una llevantó’l brazu, y otru, yo vílo nidiu nesi momentu, yera una terna pitagórica, tinía la forma de la ecuación de resolución del triángulu rectángulu, asina qu’alcé’l brazu, y otra más a la par de mio.


   -¡Tiempu! A ver Mónica. – Dixo a la cabera n’alzar el brazu.

   -Ye’l teorema de Pitagoras.

   -¡Buah!- dixe yo con fastidiu- sabíalo…

   -Sí, tien la forma de la ecuación de la hipotenusa (h2= c12+c22), asina que podemos pintalo como un triángulu rectángulu:




   -Rescamplo esto por que estudiándola bien podemos llegar a conclusiones perinteresantes. Por exemplu, la ecuación que primero nomé, E=mc2, define la enerxía de los oxetos con masa en reposu, y polo tanto ensin momentu llinial, asina que:






   -Máxicu, ¿non? Podemos cavilar nun “oxetu” ensin masa (m=0), como pue ser un fotón, la ecuación, siguiendo pasos asemeyaos al desendolque cabero, tenemos que:




   Esta espresión diz que la enerxía d’una partícula ensin masa, ye igual al so momentu pola velocidá de la lluz. Tou esto tien un inquiz perimportante, que nengún oxetu con masa puede garrar enxamás la velocidá de la lluz. Pensar por un momentu, nos triángulos rectángulos, la hipotenusa siempre ye mayor que cualesquiera de los catetos, polo que por muncho que medre’l momentu llinial, mentantes que tea masa l’oxetu, la hipotenusa siempre va ser mayor que’l catetu pc, asina que na ecuación de la velocidá del oxetu:




el cociente  pc/E enxamás va ser 1, podrá averase muncho, pero enxamás sedrá 1, polo que dixe la hipotenusa (nesti casu E) siempre ye más grande que los catetos (nel exemplu pc).


   Otra forma de calcular la enerxía ye:



   Esto sofita la idea de que nun podemos garrar la velocidá de la lluz, si tenemos masa. Si tando en movimientu, fuesemos aumentando la nuesa velocidá, hasta llegar a la velocidá de la lluz, el cociente v2/c2, sedría 1, polo que E sedría:




    Lo que diz esta ecuación, ye que a más velocidá, mayor sedrá  la masa de nueso, y al dir averándonos a la velocidá de la lluz, esta va medrar de manera descomanada, esto ye un absurdu, pues díbamos  necesitar una cantidá d’enerxía infinita, y nel Universu, por grande que seya, la cantidá d’enerxía ye finita... lo que siempre digo, la xeometría acenciella muncho les coses…


   Nesi momentu tocaba’l timbre de colar pa casa, asina que, pese a lo que acababa de dicir Toño, toos recoyimos y colamos a una velocidá superllumínica…